Llinos Jones o Brifysgol Cymru Y Dewi Sant ar restr fer gwobrau blynyddol Womenspire

Mae Prifysgol Cymru Y Drindod Dewi Sant wrth ei bodd fod Llinos Jones, Swyddog Ymgysylltu Canolfan S4C Yr Egin wedi cyrraedd y rhestr fer yn y categori Dysgwr yng ngwobrau Womenspire eleni.

Llinos Jones.

Wedi’u trefnu gan Chwarae Teg, prif elusen cydraddoldeb rhywiol Cymru, mae Gwobrau Womenspire yn dathlu llwyddiannau menywod o bob cefndir a chyfnod mewn bywyd ar hyd a lled Cymru.  

Ymunodd yr enwebai, Llinos Jones, â thîm Yr Egin – Canolfan Ddigidol a Chreadigol Prifysgol Cymru Y Drindod Dewi Sant ar gampws y Brifysgol yng Nghaerfyrddin – yn gynharach eleni ac mae’n gyfrifol am y prosiect ymgysylltu, gan weithio gyda gwahanol gymunedau ar draws Sir Gâr. Ariennir y prosiect drwy gefnogaeth ariannol cronfa LEADER - cronfa sy’n cael ei gweinyddu gan Gyngor Sir Caerfyrddin ar ran y Grŵp Cefn Gwlad ac ariennir y swydd hon yn rhannol drwy Gymunedau Gwledig Llywodraeth Cymru - Rhaglen Datblygu Gwledig Cymru 2014-2020 a gyllidwyd gan Lywodraeth Cymru a’r Undeb Ewropeaidd.

Daw enwebiad Llinos wedi iddi gymryd rhan yn llwyddiannus yn Rhaglen Datblygu Gyrfa Chwarae Teg i helpu datblygu ei hyder.  Yn ystod ei chyfnod ar y rhaglen llwyddodd Llinos i sicrhau swydd lawn amser newydd yn Yr Egin.

“Hoffwn ddiolch yn fawr iawn i Chwarae Teg am roi'r cyfle i mi ddatblygu yn broffesiynol ac yn bersonol,” meddai Llinos.  “Drwy fynychu'r cwrs yma teimlaf fy mod wedi magu'r hyder i ddysgu a datblygu gan hefyd cofio i wenu wrth wynebu heriau bywyd.

“Anrhydedd mawr iawn ydy cael fy enwebu ar gyfer y wobr yma, a doeddwn i ddim yn disgwyl cael fy enwebu o gwbl, heb sôn am gyrraedd y rhestr fer,” ychwanega Llinos.  “Merch arferol ydw i a fachodd ar y cyfle i ddysgu, gan gael y pleser o gwmni merched anhygoel ac ysbrydoledig ar hyd y daith. Roedd yn daith gyffrous iawn, ac awgrymaf yn gryf y dylai menywod fynychu’r cwrs, beth bynnag eu hoed oed a’u cefndir.  Mae o wir yn un o’r pethau gorau ‘dwi wedi ei wneud gan gael y cyfle i ddysgu, a dod i adnabod fy hun unwaith eto.

“Hoffwn ddiolch yn fawr i Helen Davies a Cheryl Royall o Chwarae Teg am yr addysg, y geiriau doeth a’r arweiniad cryf. Hoffwn hefyd ddiolch i’r merched eraill ar y cwrs am eu cwmni a’u cefnogaeth, ac i holl dîm Chwarae Teg am yr holl waith maen nhw’n ei gyflawni. Wedi’r cyfan, mae pob merch yn haeddu chwarae teg.”

Mae Womenspire yn cydnabod pob agwedd ar fywydau menywod, o lwyddiannau personol i gyfraniadau rhagorol.  

Mae’r Gwobrau’n helpu arddangos llwyddiannau anhygoel menywod ledled Cymru gyda’r nod o ysbrydoli cenedlaethau’r dyfodol. Gwelir menywod yn cael eu gwobrwyo ar draws amrywiaeth o gategorïau gan gynnwys y categori Dysgwr, a noddir gan Academi Cymru.

Oherwydd Cofid-19, mae’r gwobrau Womenspire, sydd nawr y neu pumed flwyddyn, am cael eu gynnal ar-lein am y tro cyntaf. Ar Ddydd Mawrth 29 Medi 2020 o 7.00pm byddant yn ffrydio dros Face Book Live a Twitter ITV. Mae cofrestru am ddim ac ar agor nawr drwy http://bit.ly/cofrestruWomenspire20.

Meddai Cerys Furlong, Prif Weithredwr Chwarae Teg: “Mae Womenspire yn seremoni wobrwyo unigryw. Mae wir yn dathlu ac yn arddangos talentau, diddordebau angerddol a llwyddiannau menywod Cymru. Ni sylwir ar gyflawniadau menywod yn rhy aml o lawer. Rydym ni yn Chwarae Teg eisiau newid hynny.

“Mae Llinos yn fodel rôl go iawn ac yn wirioneddol haeddu ei lle yn y rownd derfynol. Roedd yn seren go iawn o fewn ein rhaglen datblygu gyrfa, a fu’n fodd iddi feithrin yr hyder a’r sgiliau i ddatblygu yn y gwaith. Erbyn i’r noson dathlu graddio gyrraedd, roedd hi hyd yn oed yn hapus i godi ar ei thraed a siarad â’i chyd-gyfranogwyr, gan ysbrydoli pawb yn yr ystafell.

“Gwn y bydd ei hymroddiad at ddysgu’n parhau hefyd gan fod ganddi gynlluniau eisoes ar gyfer rhagor o gymwysterau ac mae’n awyddus i gamu i rôl Aelod o’r Bwrdd,” atega.

Yn rhan o’i rôl yn Yr Egin, mae Llinos yn ymgysylltu â chymunedau, cyrff a sefydliadau ledled Sir Gâr yn annog pobl o bob oed i gymryd rhan mewn gweithgareddau creadigol a digidol, a’u hysbrydoli i ymwneud â’r ganolfan.

Canolfan S4C Yr Egin.

Mae Carys Ifan, Cyfarwyddwr Yr Egin yn ymfalchïo’n fawr yn llwyddiant Llinos ac yn dymuno pob lwc iddi ar gyfer y noson wobrwyo.

“Hoffwn estyn llongyfarchiadau gwresog i Llinos ar ei henwebiad ar gyfer y wobr yma. Ers ymuno gyda thîm Yr Egin mae creadigrwydd a chyfeillgarwch Llinos wedi cydio ynom i gyd,” meddai Carys Ifan.

“Mae’n dda gweld trwy gynllun Chwarae Teg bod Llinos wedi cael cyfle i ddatblygu ei hun yn enwedig gan fod ganddi ddawn rhyfeddol i gefnogi ac annog eraill i ddatblygu, beth bynnag eu hoed neu eu profiad bywyd.  Nid yw’n syndod o gwbwl bod Llinos wedi cyrraedd y rhestr fer, mae ganddi lot fawr i’w gyfrannu ac edrychwn ymlaen at weld prosiect ymgysylltu Yr Egin yn mynd o nerth i nerth o dan ei harweiniaid.  Mae pawb yn Yr Egin yn falch iawn ohoni ac yn dymuo pob hwyl iddi yn y seremoni ym mis Medi.”

I gael rhagor o wybodaeth am Yr Egin neu i drafod cyfleoedd i ymgysylltu â’r ganolfan, cysylltwch â Llinos yn uniongyrchol trwy anfon e-bost at llinos.jones@uwtsd.ac.uk

Gwybodaeth Bellach

I gael rhagor o wybodaeth, cysylltwch â Siân-Elin Davies, Prif Swyddog Cyfathrebu a Chysylltiadau Cyhoeddus ar 01267 676908 / 07449 998476 sian-elin.davies@pcydds.ac.uk