Cynhadledd Dogfennu Jazz 2022

Bydd Prifysgol Cymru Y Drindod Dewi Sant mewn partneriaeth â Threftadaeth Jazz Cymru, yn cynnal pedwaredd gynhadledd flynyddol Dogfennu Jazz yng Nghanolfan Dylan Thomas yn Abertawe, rhwng 9 a 12 Tachwedd.

Bydd y gynhadledd eleni yn canolbwyntio ar thema amrywiaeth a'r nod yw creu fforwm rhyngddisgyblaethol cynhwysol ac eang ei gwmpas er mwyn miniogi ymwybyddiaeth, rhannu astudiaethau a phrofiadau, a chanolbwyntio'r drafodaeth ar agweddau niferus amrywiaeth mewn jazz heddiw.

Y prif siaradwyr fydd Dr Joan Cartwright, awdur, lleisydd a chyfansoddwr jazz a blues byd enwog, a Dr Francesco Martinelli, hanesydd jazz enwog, addysgwr ac awdur "The History of European Jazz".  Ymhlith y siaradwyr eraill fydd Jenna Bailey, awdur o Ganada, hanesydd llafar a gwneuthurwr ffilmiau dogfen sydd wedi ennill gwobrau, y bydd ei llyfr nesaf ar Fand Merched Ivy Benson.

Fe fydd perfformiadau byw hefyd gan Burum, band unigryw Cymreig sy'n asio traddodiad gwerin Cymru a jazz, gyda pherfformiadau eraill i'w cadarnhau.

Treftadaeth Jazz Cymru yw'r casgliad Jazz aml-gyfrwng hynaf yn y DU, a hwn yw'r unig gasgliad sy'n arbenigo mewn cerddoriaeth jazz merched ac etifeddiaeth ddiwylliannol cerddoriaeth Americanaidd Affricanaidd yng Nghymru, wedi'i leoli yng Nghanolfan Dylan Thomas y Brifysgol. Dechreuodd yn 1986 gyda Hanesion Llafar ac adolygiad o unrhyw ddeunydd tebyg yng nghasgliadau archifol Cymru a’r DU. Dros y blynyddoedd, casglwyd llawer o Hanesion Llafar. Creodd y cysylltiadau hyn sylfaen gwaith Prosiect a rhoddion parhaus.

Meddai'r Athro Jen Wilson, pianydd Jazz, awdur, cyfansoddwr a sylfaenydd Treftadaeth Jazz Cymru: "Mae'r Gynhadledd yn fenter newydd i ni a dylai ennyn diddordeb rhyngwladol yn nhreftadaeth ddiwylliannol Cymru sydd ar gael yn ein Casgliadau.  Rwy'n ddiolchgar i'n Bwrdd Ymddiriedolwyr, gwirfoddolwyr a'r Drindod Dewi Sant am ddiogelu'r archif ddiddorol a phwysig hon ar gyfer y cenedlaethau i ddod.

Ychwanegodd: "Hanesion Llafar sydd wrth wraidd unrhyw brosiect hanes neu dreftadaeth, gan ddatgelu bywydau'r anenwog yn ogystal â'r sêr mawr. Mae'r holl straeon hyn yn helpu i lunio sut y datblygodd ein treftadaeth ddiwylliannol.

"Yn ddiweddar, mae'r Brifysgol Agored wedi defnyddio ein gwaith ymchwil ar gyfer eu cyfres cerddoriaeth How Jazz Came to Wales. Defnyddiodd y rhaglen ddogfen BBC4 ar y gantores blues Ottilie Patterson, ‘My Name is Ottilie’, hefyd ein gwaith ymchwil a Hanes Llafar Ottilie. Cafodd ei gwneud gan DoubleBand Films a chaiff ei dangos yn 2023. "

Meddai'r Athro Ian Walsh, Profost Campysau Abertawe a Chaerdydd Y Drindod Dewi Sant, "Mae Dogfennu Jazz 2022 yn llawer mwy na chynhadledd academaidd, ac mae'n ddathliad o’r rôl unigryw y mae jazz wedi ei chwarae wrth lunio tirwedd ddiwylliannol a chreadigol Abertawe ar ddiwedd y 19eg a dechrau'r 20fed ganrif. Cynigodd lwyfan gweladwy ar gyfer amrywiaeth a chynhwysiant mewn oes pan oedd y naill a’r llall yn brin."

Bydd y gynhadledd yn codi'r cwestiynau canlynol:

Pwy sy'n rhoi llais i amrywiaeth yn y byd jazz?

Beth mae amrywiaeth yn ei olygu mewn Astudiaethau Jazz yn benodol?

Ydy jazz, yn arfer cerddorol a chymdeithasol, yn cyfrannu i ddeialog rhyngddiwylliannol?

Ydy jazz wedi pontio ffiniau y tu hwnt i'w isddiwylliannau?

Ydy amrywiaeth a chynhwysiant yn broblemau o fewn addysg ac ymchwil prif ffrwd, rhaglenni, safbwyntiau, moeseg, a methodolegau?

Beth allwn ni ei ddweud am ymarfer jazz, ei hanesion, a'i gymunedau?

Cyhoeddwyd galwad am bapurau sy'n mynd i'r afael â'r thema amrywiaeth ac mae'n cynnig y pwyntiau gadael canlynol:

* Jazz ar/mewn Ffilm a Theledu

* Jazz yn Arfer Cymdeithasol

* azz a Thechnoleg

* Jazz a Rhyw

* Jazz a Rhywioldeb

* Jazz a Gwleidyddiaeth

* Jazz ac Estheteg

* Jazz a Diwylliant Gweledol

* Jazz ac Anabledd

* Jazz a Gwaith Byrfyfyr

* Jazz a'r Amgylchedd/Ecoleg

* Jazz a'r byd rhithwir/AI

* Jazz a Llesiant

* Arfer Perfformio Jazz

* Jazz yn y Dychymyg Poblogaidd

* Jazz yn Ddisgwrs

* Jazz a'i Etifeddiaeth Treftadaeth

* Jazz a'i Chymunedau Sy'n Dod i'r Amlwg

Mae Treftadaeth Jazz Cymru yn ddiolchgar am gefnogaeth Prifysgol Cymru Y Drindod Dewi Sant ynghyd â Choleg Brenhinol Cerdd a Drama Cymru a Jazz Aberhonddu.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau

Executive Press and Media Relations Officer

Cyfathrebu Corfforaethol a Chysylltiadau Cyhoeddus

Corporate Communications and PR

Mobile: 07384 467071

Email: Rebecca.Davies@uwtsd.ac.uk