Prifysgol Cymru Y Drindod Dewi Sant (PCYDDS) ar restr fer Gwobrau Rhagoriaeth Springboard 2022

Mae rhaglenni Rheolaeth Twristiaeth a Digwyddiadau Prifysgol Cymru Y Drindod Dewi Sant (PCYDDS) wedi cyrraedd rhestr fer Gwobrau Rhagoriaeth Springboard 2022, wedi’u henwebu ar gyfer y Wobr am y Bartneriaeth Orau rhwng byd Addysg a Diwydiant, mewn cydnabyddiaeth o gydweithrediadau’r Brifysgol â Diwydiant sy’n helpu myfyrwyr i adeiladu rhwydweithiau gyrfaol rhagorol gydag arweinwyr marchnadoedd ledled y byd.

Mae gan raglenni Rheolaeth Twristiaeth a Digwyddiadau’r Brifysgol naws ddiwydiannol sylweddol, ac maent yn cynnwys teithiau astudio rhyngwladol, ymweliadau â diwydiannau i weld yr hyn sy’n digwydd yn y cefndir, ac interniaethau cyfannol a ariennir gyda sefydliadau blaenllaw a digwyddiadau lleol a rhyngwladol.  

Meddai Jacqui Jones, Rheolwr Rhaglen Digwyddiadau Rhyngwladol, Twristiaeth a rhaglenni Rheolaeth Cyrchfannau Hamdden PCYDDS: “Rydym wrth ein boddau i gael ein henwebu ar gyfer y wobr am y Bartneriaeth Orau rhwng byd Addysg a Diwydiant. Mae’n gydnabyddiaeth ardderchog o’n hymgysylltu â’r diwydiant yn fyd-eang ac yn lleol, o’n  myfyrwyr gwych, ac o’r gefnogaeth a’r ysbrydoliaeth anhygoel a roddir iddynt gan ein graddedigion a chan arweinwyr diwydiant, sef eu mentoriaid.

“Rydym yn edrych ymlaen at ddathlu’r enwebiad gyda’n digwyddiadau diwydiant ar gyfer myfyrwyr, sydd ar ddod, gan gynnwys Rhedeg y Trac gyda Chwrs Rasio Ffos Las, Digwyddiadau ‘Twristiaeth Ryngwladol a Chymru yn Cwrdd â’r Arbenigwyr’, a chynadleddau diwydiant a drefnir gan fyfyrwyr ar gyfer ysgolion a cholegau.” 

Caiff y seremoni wobrwyo ei chynnal yn yr Amgueddfa Wyddoniaeth, yn Llundain ar Ebrill 7^fed. 

Sefydlwyd Springboard yn 1990 i gefnogi’r diwydiant lletygarwch, hamdden a thwristiaeth, a’r sawl sy’n chwilio am waith yn y meysydd hyn.

Yn gweithio’n genedlaethol ar draws y DU a’r Iwerddon, mae ei waith yn cynnwys tri maes allweddol:

Rhaglenni hyfforddiant cyflogadwyedd – yn helpu pobl sydd dan anfantais i ddysgu sgiliau meddal a chaled, cael mewnwelediad i’r diwydiant, a chael cyfleoedd lleoliad gwaith – yn arwain yn gyffredinol at well lesiant, cyflogadwyedd gwell a phontio i gyrchfannau positif, gan gynnwys gwaith/addysg bellach/prentisiaeth/ac ati. 

Rhaglenni addysg – gweithio gydag ysgolion, colegau a phrifysgolion i gyfoethogi addysgu’r cwricwlwm a gyflwynir i fyfyrwyr – a’u helpu nhw i gael mewnwelediad allweddol i ddiwydiant a datblygu’r sgiliau sydd eu hangen arnynt i bontio o fyd addysg i fyd gwaith.

Adnoddau a chyngor gyrfaol – yn darparu gweithgareddau gyrfaol arbenigol ar-lein, wyneb yn wyneb ac mewn digwyddiadau gyrfaol.

Meddai Chris Gamm, Prif Swyddog Gweithredol Springboard: Mae Gwobrau Rhagoriaeth Springboard yn ymwneud â dathlu’r busnesau a’r unigolion hynny sy’n gwneud gwaith gwych drwy hyrwyddo lletygarwch, datblygu ein pobl, atynnu talent a chefnogi cenhadaeth Springboard i ddiogelu’r cyflenwad talent rhag y dyfodol. Llongyfarchiadau i bob busnes gwych a wnaeth gyrraedd y rhestr fer eleni; edrychwn ymlaen at ddathlu gyda chi ar ddydd Iau, Ebrill 7^fed yn Illuminate London.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau

Executive Press and Media Relations Officer

Cyfathrebu Corfforaethol a Chysylltiadau Cyhoeddus

Corporate Communications and PR

Mobile: 07384 467071

Email: Rebecca.Davies@uwtsd.ac.uk