Ymchwil ar y cyd yn amlygu pwysigrwydd hyfforddiant ac addysg i gefnogi gweithwyr proffesiynol a theuluoedd o ran llythrennedd corfforol plant

Mae ymchwil gan fyfyrwraig PhD, Dr Amanda John, sy’n graddio heddiw o Brifysgol Cymru Y Drindod Dewi Sant ar gampws Caerfyrddin, wedi amlygu pwysigrwydd datblygu hyfforddiant a datblygiad proffesiynol cadarn ar gyfer athrawon y blynyddoedd cynnar, a phob oedolyn sy’n gweithio gyda phlant ifanc, fel y gallant gefnogi datblygiad corfforol y plant drwy weithgareddau ac amgylcheddau priodol.

Mae’r gwaith hwn yn adeiladu ar dros 30 mlynedd o ymchwil a gynhaliwyd yn fyd-eang gan yr Athro Jackie Goodway o Brifysgol Talaith Ohio yn yr Unol Daleithiau ac mae’n pwysleisio’r angen am fwy o waith yn cefnogi datblygiad corfforol yn ystod plentyndod cynnar i hybu llwybrau iechyd cadarnhaol ar gyfer ein plant yng Nghymru.

Roedd yr Athro Goodway yn rhan o dîm goruchwylio Dr John ynghyd â Dr Nalda Wainwright a Dr Andy Williams. Roedd astudiaeth Dr John yn astudio effaith rhaglen SKIP Cymru ar sgiliau echddygol plant, hunanganfyddiadau o symud a gweithgarwch corfforol ac roedd yn brosiect a ariannwyd gan yr Undeb Ewropeaidd mewn partneriaeth â Chwaraeon Cymru.

Mae ymchwil Dr John wedi’i dderbyn ar gyfer cyflwyniad yng Nghynhadledd CIAPSE yn Lwcsembwrg yn ddiweddarach eleni ac mae’n ategu’r corff helaeth o ymchwil y mae Academi Iechyd a Llythrennedd Corfforol Cymru wedi’i ddatblygu ym maes datblygiad corfforol yn ystod plentyndod cynnar.

Mae gwaith SKIP Cymru wedi’i gydnabod am ei effaith fel argymhelliad yn adroddiad Pwyllgor Iechyd a Gofal Cymdeithasol a Chwaraeon Llywodraeth Cymru ar Weithgarwch Corfforol ymhlith Plant a Phobl Ifanc. Mae wedi’i gynnwys fel astudiaeth achos ar gyfer deunyddiau ategol Taith tuag at Gymru Iachach yn gysylltiedig â Deddf Llesiant Cenedlaethau’r Dyfodol ac fel astudiaeth achos effaith ar gyfer cyflwyniad y Drindod Dewi Sant i’r REF 2021.

Mae Dr John a’r tîm yn Academi Iechyd a Llythrennedd Corfforol Cymru yn parhau i roi’r ymchwil hwn ar waith gan ddatblygu rhaglenni hyfforddi i athrawon, ymarferwyr blynyddoedd cynnar, hyfforddwyr chwaraeon, gwirfoddolwyr a rhieni yn barhaus.

Dywedodd Dr Wainwright, arweinydd rhaglen yr MA a Chyfarwyddwr Academi Iechyd a Llythrennedd Corfforol Cymru yn y Drindod Dewi Sant: “Rwy mor falch o weld Amanda yn graddio gyda'i PhD, mae wedi gweithio'n eithriadol o galed drwy ei thaith ar ein rhaglen MA yn gyntaf ac yna wrth iddi fynd â’i hymchwil i lefel newydd ar gyfer ei doethuriaeth. Mae’r maes ymchwil hwn mor bwysig ac mae angen i ni nawr yn fwy nag erioed gefnogi gweithwyr proffesiynol a theuluoedd gyda llythrennedd corfforol plant.

“Rwy wrth fy modd fod yr Athro Goodway wedi gallu bod yn bresennol yma ar gyfer y graddio wrth i ni barhau i ddatblygu ein cydweithio ym maes ymchwil a chreu cyfleoedd i fyfyrwyr yn y Drindod Dewi Sant gefnogi iechyd a llythrennedd corfforol yng Nghymru.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau

Executive Press and Media Relations Officer

Cyfathrebu Corfforaethol a Chysylltiadau Cyhoeddus

Corporate Communications and PR

Mobile: 07384 467071

Email: Rebecca.Davies@uwtsd.ac.uk