Cyhoeddi prentisiaethau gradd newydd i helpu i adeiladu Cymru’r dyfodol

Mae Prifysgol Cymru Y Drindod Dewi Sant (PCYDDS) wedi ymuno â Llywodraeth Cymru i lansio prentisiaethau gradd newydd mewn Rheoli Adeiladu, a Mesur Meintiau. 

Gan ddechrau ym mis Medi 2024, bydd y rhaglenni pedair blynedd hyn, a ariennir yn llawn gan Lywodraeth Cymru, yn cynnig cyfle i fyfyrwyr ennill gradd wrth ennill profiad ymarferol. 

Gyda’r sector adeiladu yn unig angen 11,000 o weithwyr ychwanegol erbyn 2028, mae’r prentisiaethau gradd newydd yn dod ar adeg dyngedfennol.

Dywedodd yr Athro Elwen Evans, KC, Is-ganghellor PCYDDS: “Rydym wrth ein bodd bod y Prentisiaethau Gradd Adeiladu bellach ar gael i gyflogwyr a phrentisiaid yn y sector. Bydd y rhaglenni hyn yn galluogi unigolion i ddatblygu set sgiliau lefel uchel a fydd o fudd iddynt hwy a’u cyflogwyr mewn sector cyffrous sy’n symud yn gyflym.”

Dywedodd Ysgrifennydd y Cabinet dros yr Economi, Ynni a’r Gymraeg, Jeremy Miles: “Mae’r rhaglenni hyn nid yn unig yn paratoi unigolion ar gyfer swyddi y mae galw mawr amdanynt a galwedigaethau cyflog uwch, ond byddant hefyd yn sicrhau gweithlu medrus, gwydn a blaengar i yrru. twf economaidd a darparu atebion arloesol i heriau cymdeithasol a hinsawdd.”

Dywedodd Gareth Williams, Rheolwr Safonau a Chymwysterau (Cymru) CITB: “Mae angen llwybrau gyrfa clir i mewn i’r diwydiant ar bobl sydd eisiau gweithio ym maes adeiladu ac mae’r prentisiaethau gradd adeiladu newydd hyn yn garreg filltir arwyddocaol tuag at gyflawni hyn. Mae lansio’r prentisiaethau hyn hefyd yn dangos sector yn cyd-dynnu mewn cyfeiriad a rennir i oresgyn heriau diwydiant a heriau ehangach.”

Anogir cyflogwyr i fanteisio ar y cyfle hwn trwy gyflogi prentisiaid newydd neu uwchsgilio eu gweithlu presennol. Mae’r rhaglen yn agored i bobl o bob oed, p’un a ydynt yn ffres allan o brentisiaethau Lefel A neu Lefel-4 neu eisoes yn gweithio.

Mae Jac Beynon yn gweithio fel Mesurydd Maint Cynorthwyol i Jones Brothers (Henllan) Cyf yn Cross Hands, Llanelli ac mae newydd gwblhau ei HND mewn Mesur Meintiau ym Mhrifysgol Cymru Y Drindod Dewi Sant fel rhan o’i raglen Prentisiaeth Uwch. Fe fydd yn un o’r garfan gyntaf i ddechrau’r rhaglen radd-brentisiaeth newydd yn y Brifysgol ym mis Medi.

Dywedodd Jac, sy’n 21 mlwydd oed: “Rwyf wedi bod yn ymwneud ag adeiladu ers yn ifanc iawn oherwydd bod gan fy nhad ei gwmni adeiladu ei hun, felly byddwn yn aml yn mynd allan i wahanol safleoedd ac yn ymweld ag ef lle bynnag yr oedd yn gweithio. Arweiniodd hyn i mi weithio’n rhan amser gydag ef wrth i mi fynd yn hŷn a phan gefais amser i ffwrdd o’r ysgol ac ar benwythnosau. Rhoddodd hyn ddealltwriaeth werthfawr i mi o’r diwydiant o oedran ifanc.

“Roeddwn i’n gwybod nad oeddwn i eisiau bod ar y safle nac yn y swyddfa’n llawn amser felly wrth i mi orffen fy Lefel A yn yr ysgol roeddwn i’n archwilio fy opsiynau o ran beth i’w wneud nesaf, meddyliais am fynd i’r brifysgol yn llawn amser, ond doeddwn i ddim yn hoffi’r syniad o aros tair neu bedair blynedd cyn dechrau gweithio. Felly pan soniodd rhywun am gynllun prentisiaeth a fyddai’n caniatáu i mi weithio a dysgu ar yr un pryd fe’m darbwyllwyd.

“Fe’m denwyd at Mesur Meintiau gan fy mod yn meddwl y byddai’n berffaith – amser yn y brifysgol i ddysgu sgiliau newydd ac amser ar y safle i’w rhoi ar waith.

“Fy mhrif nod yw cael profiad ymarferol yn fy newis faes. Rwyf am ddatblygu sgiliau diwydiant-benodol sy’n uniongyrchol berthnasol i senarios byd go iawn.

“Mae ymgymryd â phrentisiaeth hefyd yn ymwneud â meithrin hyder yn fy ngallu i drin cyfrifoldebau proffesiynol a gwneud penderfyniadau gwybodus yn annibynnol.”

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071