Y Myfyriwr prifysgol cyntaf yn ei deulu yn arddangos ei waith graddedig
Mae Drew Dennehy, o Bridgewater yng Ngwlad yr Haf, ymhlith grŵp o fyfyrwyr pensaernïaeth blwyddyn olaf sy’n arddangos eu gwaith ym Mhrifysgol Cymru Y Drindod Dewi Sant yn Abertawe yr wythnos hon.
Roedd ei brosiect blwyddyn olaf yn archwilio fferm fertigol drefol a materion cyflenwi bwyd cynaliadwy. Dywed:
“Gyda’r angen byd-eang i leihau allyriadau carbon mae ffermio fertigol yn ddatrysiad sydd wedi codi ohono. Mae fy mhrosiect yn cynnwys fferm fertigol acwronig sy’n cynnwys system dosbarthu dŵr a rennir rhwng planhigion a physgod lle gellir rhannu maetholion fel nitrites a nitradau rhwng y ddau amgylchedd. Dau o’r cysyniadau allweddol a gymerwyd drwy’r cynllun hwn oedd arddangos prosesau’r math yma o ffermio, a chreu taith i’r cyhoedd er mwyn eu haddysgu am y math newydd hyn o adeiladu”.
Drew yw’r cyntaf yn ei deulu i fynd i’r brifysgol, gan oresgyn llawer o rwystrau ar y ffordd i gyflawni ei uchelgais o astudio pensaernïaeth.
Ar ôl derbyn canlyniadau TGAU da, cafodd Drew ei lywio tuag at yrfa ym maes adeiladu, er gwaethaf ei ddiddordeb mewn dilyn gyrfa greadigol. Ar ôl 18 mis fel prentis plymio a gwresogi a chyflawni ei gymwysterau lefel 2 a 3, roedd yn dal i fod eisiau archwilio gyrfa a fyddai’n ei alluogi i ddatblygu ei sgiliau personol a phroffesiynol mewn maes creadigol. Er iddo gysylltu â sawl prifysgol i ddarganfod pa opsiynau oedd ar gael iddo, cafodd ei wrthod yn fynych.
Dywedodd Drew: “Cwblhawyd y cwrs plymio trwy brentisiaeth a oedd yn golygu nad oedd gen i Lefel A draddodiadol i’s gynnig. Yn syth roedd y prifysgolion y cysylltais â nhw yn gy nghynghori i gael Lefel A ac i gysylltu wedyn. Felly, es yn ôl i’m coleg a roddodd wybod i mi, oherwydd fy mod dros 19 oed, y byddai’n rhaid i mi dalu am hyfforddiant preifat a’r arholiadau. Ar y pryd roeddwn i’n gweithio am £6.90 yr awr felly doedd hyn ddim yn opsiwn i mi. Fe wnes i barhau i ofyn i wahanol brifysgolion a allent fy nerbyn fel myfyriwr aeddfed ond eto cefais fy ngwrthod heb fawr o gyngor ar beth arall y gallwn ei wneud i gyflawni eu gofynion mynediad”.
Er iddo ymgymryd â phrofiad gwaith gyda phensaer a llunio portffolio, roedd yn dal i gael ei wrthod gan y prifysgolion a aeth atynt. Daeth tro yn ei fyd drwy gyfarfod ar hap gyda chyn-aelod o staff PCYDDS a ddywedodd wrtho am gysylltu ag Ian Standen, cyfarwyddwr y cwrs pensaernïaeth.
Aeth Drew yn ei flaen:
“Mynychais ddiwrnod agored nesaf y Brifysgol, a oedd ar-lein oherwydd COVID-19, a gofynnais i siarad ag Ian yn breifat ar y diwedd pan amlinellais fy sefyllfa. Ef oedd y darlithydd cyntaf y siaradais ag ef a oedd yn cydnabod fy nghefndir plymio fel mantais ym myd pensaernïaeth a gofynnodd am weld portffolio iddo ei adolygu. Felly, o’r fan honno, es i drwy’r system ymgeisio UCAS a chael cynnig am le yn y Brifysgol lle rwyf wedi parhau i fod yr un mor frwdfrydig ac angerddol am y pwnc a byddaf yn graddio eleni.
“Mae’r darlithwyr a’r myfyrwyr eraill wedi bod yn wych. Mae lefel amser un wrth un gyda darlithwyr yn rhywbeth nad oes yr un o fy ffrindiau yn dweud wrthyf eu bod wedi ei brofi mewn prifysgolion eraill. Mae lefel iach o gystadleuaeth lle mae pawb eisiau cynhyrchu eu gwaith gorau, ond os bydd rhywun yn darganfod techneg newydd, maen nhw’n dal i’w rhannu ymhlith eu cyfoedion. Dros y tair blynedd diwethaf, rydyn ni i gyd wedi dod yn agos ac wedi dod i adnabod ein gilydd yn dda. Mae gweld sut maen nhw wedi datblygu pob un yn unigol wedi gorfod bod yn un o’r uchafbwyntiau mwyaf i mi”.
“Mae’r darlithwyr yn glod i’r cwrs ac yn paratoi myfyrwyr ar gyfer ymarfer. Rydym yn astudio agweddau busnes a thechnegol dylunio yn ogystal â’r estheteg sy’n ein galluogi i gynnig mwy i gyflogwyr. Roedd y darlithwyr hefyd yn hawdd mynd atynt mewn person a thros y ffôn”.
Dywedodd Ian Standen, Cyfarwyddwr y Cwrs:
“Rhaid i’r athro rywsut weld y tu hwnt i’r presennol a chydnabod egin botensial myfyriwr, i feithrin, annog ac arwain y dalent gudd.
“Nid yw cyfle yn gwneud y pensaer; Mae’n datgelu’r disgleirdeb sydd eisoes y tu mewn. Mae cyflawniadau Drew yn dyst i’w ddawn a’i ymroddiad. Fy neges iddo wrth iddo ymadael yw parhau i ddylunio ei freuddwydion, oherwydd y byd yw ei gynfas nawr. “
Yn ystod ei gyfnod yn y Brifysgol, mae Drew wedi cael llawer o brofiadau, gan gynnwys cynrychioli’r Brifysgol mewn digwyddiad WorldSkills UK ar gyfer adeiladu digidol. Mae wedi cwblhau cynllun mentora Cymdeithas Frenhinol Penseiri yng Nghymru (RSAW) ac yn ystod y cyfnod hwnnw bu’n ymweld yn aml â’r practis pensaernïaeth Powell Dobson ar gyfer adolygiadau a thrafodaethau am ei CV ac fe’i enwebwyd yn ddiweddar ar gyfer Medal Efydd yr RIBA.
Gwybodaeth Bellach
Eleri Beynon
Pennaeth Cyfathrebu Corfforaethol a Chysylltiadau Cyhoeddus
Cyfathrebu Corfforaethol a Chysylltiadau Cyhoeddus
E-bost: eleri.beynon@pcydds.ac.uk
Ffôn: 07968 249335