Cydnabyddiaeth genedlaethol i fenyw ifanc o Lanelli
Mae gwaith academaidd a natur benderfynol un o raddedigion Coleg Celf Abertawe, Prifysgol Cymru Y Drindod Dewi Sant, wedi cael eu cydnabod yn y Senedd.
![Summer Davies a Jane Hutt AS yn gafael bocs sy’n cynnwys y wobr wydr siâp deilen ac yn gwenu.](/sites/default/files/styles/media_component_16_9_sm/public/2023-10/national-recognition-for-llanelli-young-woman.jpg?h=82f92a78&itok=HF6dAb1Z)
Enillodd Summer Davies, a raddiodd ym mis Gorffennaf o’r cwrs BA Dylunio Graffig, y wobr Cyflawniad Academaidd Eithriadol yng Ngwobrau Ieuenctid Cenedlaethol Hanes Pobl Dduon Cymru 2023, a gynhaliwyd yn y Senedd wythnos diwethaf.
Roedd y categori a enillwyd gan Summer ar gyfer myfyrwyr a oedd wedi cyflawni canlyniadau rhagorol yn eu rhaglen addysgol, neu wedi goresgyn rhwystrau sylweddol i gyflawni’r graddau uchaf posibl mewn arholiadau, asesiadau neu brofion.
Cynhaliwyd y digwyddiad gan Race Council Cymru a’i noddi gan y Gweinidog Cyfiawnder Cymdeithasol, Jane Hutt AS.
Meddai Summer: “Am noson anhygoel. Roeddwn i mor emosiynol! Roedd yn anrhydedd i dderbyn y wobr hon a oedd yn cydnabod fy mhrofiadau heriol a’r modd y llwyddais i ffynnu yn y Drindod Dewi Sant er gwaethaf popeth.
“Defnyddiais fy mhrosiectau prifysgol i adfyfyrio ar y sefyllfaoedd anodd a’r trafferthion dwys a wynebais yn yr ysgol, fel merch ifanc ddu o Lanelli. Mae newid cadarnhaol a dathlu gwahaniaeth bob amser wedi fy ysbrydoli, felly creais ymgyrchoedd i addysgu a thynnu sylw at y problemau sy’n parhau.
“Mae’n deimlad gwych i gael fy nghydnabod am fy ymdrechion ac rwy’n wirioneddol ddiolchgar i gael rhannu’r foment hon gyda phawb yn y Senedd nos Iau. Diolch i Race Council Cymru a Hanes Pobl Dduon Cymru am drefnu’r achlysur blynyddol arbennig hwn i ddathlu pobl ifanc du Cymru!”
![Enillwyr gwobrau yng Ngwobrau Ieuenctid Cymru Hanes Pobl Ddu Cenedlaethol 2023 yn dal eu tystysgrifau.](/sites/default/files/styles/media_component_16_9_sm/public/2023-10/national-recognition-for-llanelli-young-woman-2.jpg?h=82f92a78&itok=w317ZGth)
Enwebwyd Summer gan Donna Williams, Rheolwr Rhaglen BA Dylunio Graffig yn y Drindod Dewi Sant, a ddywedodd: “Er iddi wynebu profiadau torcalonnus yn ystod ei blynyddoedd ffurfiannol yn yr ysgol, gwnaeth Summer ffynnu wrth astudio am ei gradd prifysgol. Gyda’i natur benderfynol a’i hangerdd i weithio gyda’i chreadigrwydd, enillodd un o’r marciau uchaf a ddyfarnwyd erioed ar y cwrs.
“Yn wyneb pob rhwystr, byddai Summer yn ymateb gyda graslonrwydd, amynedd a gostyngeiddrwydd dwfn wrth ddefnyddio ei phrofiadau poenus ei hun i addysgu eraill mewn ffordd addfwyn am hiliaeth. Rwy’n teimlo cymaint o falchder wrth weld Summer yn derbyn y wobr bwysig ac arwyddocaol hon. Diolch i Wobrau Ieuenctid Cenedlaethol Hanes Pobl Dduon Cymru, a Race Council Cymru am greu’r gwobrau grymusol hyn ar gyfer ein pobl ifanc du.”
Estynnodd yr Athro Uzo Iwobi CBE FLSW, Is-lywydd Coleg Brenhinol Cerdd a Drama Cymru a Sylfaenydd a Phrif Swyddog Gweithredol Race Council Cymru “longyfarchiadau enfawr i fyfyrwraig anhygoel”, gan ddweud ei bod “wrth ei bodd bod Summer yn gallu ysbrydoli dysgwyr eraill i anelu am y brig. Rydyn ni i gyd mor falch ohoni!”
Mae Prifysgol Cymru Y Drindod Dewi Sant yn cynnig rhaglenni creadigol arloesol yng Ngholeg Celf Abertawe. Daeth y rhaglen Dylunio Graffig yn 1af yng Nghymru ac yn 11eg yn y DU yn Nhablau Cynghrair Prifysgolion y Guardian 2024.
![Mae siaradwr yn annerch cynulleidfa o lwyfan ym mynedfa’r Senedd; gellir gweld Bae Caerdydd a Phenarth trwy’r waliau gwydr tryloyw tu ôl iddi.](/sites/default/files/styles/media_component_16_9_sm/public/2023-10/national-recognition-for-llanelli-young-woman-3.jpg?h=82f92a78&itok=2Grgmtvj)
Gwybodaeth Bellach
Ella Staden
Swyddog y Wasg a’r Cyfryngau
Cyfathrebu Corfforaethol a Chysylltiadau Cyhoeddus
E-bost: ella.staden@pcydds.ac.uk
Ffôn: 07384467078