Penodi darlithydd yng Ngholeg Celf Abertawe, PCYDDS yn Arbenigwr Addysg y Ffordd Sidan
Mae Timi O’Neill, Cyfarwyddwr Rhaglen y Ddoethuriaeth Broffesiynol mewn Celf a Dylunio yng Ngholeg Celf Abertawe, PCYDDS wedi’i benodi’n Arbenigwr Addysg y Ffordd Sidan yng Nghynghrair Ryngwladol Addysg Fideo Digidol a Chelf Ffotograffig.
Cafodd y penodiad ei wneud yn dilyn gweithdy adrodd straeon trochol, llwyddiannus dros gyfnod o bythefnos i fyfyrwyr yn Academi Celf Gain nodedig Xi’an (XAFA) yn Tsieina, ochr yn ochr â phum ymarferydd academaidd o Serbia, y DU, yr Aifft, yr Eidal ac UDA. Mae’n cydnabod ei arbenigedd a’i gyfraniad sylweddol ac mae’n tystio i’w ymrwymiad i hyrwyddo integreiddio celf a thechnoleg mewn addysg a’i allu i ysbrydoli myfyrwyr i archwilio ffurfiau newydd o fynegiant artistig.
Nod gweithdy Timi dan y teitl “Adrodd Straeon Trochol” oedd rhoi’r sgiliau a’r wybodaeth oedd eu hangen ar fyfyrwyr i arddangos eu naratifau creadigol trwy blatfformau cyfryngau digidol. Gan ddefnyddio eu sgiliau newydd, lluniodd y myfyrwyr arddangosfa drochol aml-sgrin gyfareddol dan y teitl ‘Residuum: Xi’an.
Roedd arfer gofodol y ffilm hon yn cynnig golygfa sinematig unigryw a phersonol o’r ddinas i hyrwyddo’r ddinas o safbwyntiau sy’n anghyffredin i bobl o’r tu allan, gan daflu goleuni ar agweddau llai cyfarwydd o’i hanes cyfoethog a’i diwylliant bywiog. Roedd y dull arloesol hwn o adrodd straeon yn caniatáu i’r myfyrwyr drochi gwylwyr yn elfennau creiddiol Xi’an, gan roi persbectif newydd ar y ddinas.
Ochr yn ochr â gwaith y myfyrwyr, bu Timi’n arddangos ei waith ffotograffig AI ei hun dan y teitl ‘Beth sy’n weddill? Dyddiadur ffotograffau awto-ethnograffig o Baris.’ Mae’r gwaith yn archwilio ymdrechion Timi i gyd-greu atgofion gydag deallusrwydd artiffisial (AI).
Yn rhan o’r digwyddiad ‘Gwaith Crefft, 8fed Academi Celfyddydau Ryngwladol Academi Celf Xi’an’, cyflwynodd Timi ddarlith ar Ddatgloi Creadigrwydd: Al a Thechnoleg Drochol yn y Diwydiannau Creadigol.
Meddai Timi: “Rwy’n eithriadol o falch o lwyddiant arddangosfa ‘Residuum:Xi’an’ a’r gwaith arloesol a grëwyd gan fyfyrwyr XAFA. Roedd eu creadigrwydd, ar adegau, yn anhygoel. Mae dyfodol celf a dylunio Tsieineaidd mewn dwylo diogel. Mae’r Brifysgol yn edrych ymlaen at barhau i gydweithio â XAFA a’u myfyrwyr yn y dyfodol. Rydym yn gobeithio parhau i feithrin amgylchedd dysgu trawsddiwylliannol, creadigol a thrawsnewidiol.”
Mae’r Ddoethuriaeth Broffesiynol mewn Celf a Dylunio yn hyrwyddo ymchwil seiliedig ar arfer sy’n integreiddio ffyrdd newydd o feddwl gyda thechnolegau newydd mewn celf, dylunio a diwydiannau creadigol.
Gwybodaeth Bellach
Rebecca Davies
Swyddog Gweithredol Cysylltiadau â’r Wasg a’r Cyfryngau
Cyfathrebu Corfforaethol a Chysylltiadau Cyhoeddus
E-bost: rebecca.davies@pcydds.ac.uk
Ffôn: 07384 467071