Rheolydd yr Atom yn ymuno â charfan Academi Arweinwyr y Dyfodol 2023

Llongyfarchiadau i Caryl Jones, Rheolydd Yr Atom yng Nghaerfyrddin sydd wedi bod yn llwyddiannus i gael ei derbyn fel rhan o garfan Academi Arweinwyr y Dyfodol 2023.

Mae’r Academi arloesol ac uchelgeisiol hon sy’n cael ei arwain gan Gomisiynydd Cenedlaethau’r Dyfodol Cymru wedi bod yn rhedeg ers tair blynedd bellach, ac mae’n rhoi cyfle i ysbrydoli pobl ifanc i ddysgu a gwella eu sgiliau arwain fel ffordd i gyflawni dyheadau Deddf Llesiant Cenedlaethau’r Dyfodol.

Bydd Caryl, sy’n hannu o Faesybont, Cwm Gwendraeth ac wedi bod wrth y llyw yn Yr Atom ers 2022 ar ran Prifysgol Cymru y Drindod Dewi Sant,  yn ymuno â charfan dethol o 30 o gyfranogwyr o bob rhan o sectorau cyhoeddus, preifat a gwirfoddol Cymru a hynny yn dilyn proses ymgeisio cystadleuol.

Dywedodd Caryl:  

“Rwy’n hynod o falch o gael lle yn Academi Arweinwyr y Dyfodol. Rwy’n teimlo ei fod wedi dod ar yr adeg iawn i mi, fel Rheolwraig Yr Atom, mae hwn yn gyfle gwych i mi ddatblygu fy hun yn bersonol ond hefyd datblygu fy sgiliau arweinyddiaeth er mwyn sicrhau fod gan Yr Atom arweinydd cryf. Yn ogystal mae’n gyfle grêt i ddysgu fwy am Ddeddf Llesiant Cenedlaethau’r Dyfodol a’r saith nod llesiant, ac mi fydd hyn yn ddefnyddiol iawn wrth i ni gynllunio dyfodol Yr Atom.

“Rwy’n edrych ymlaen at gydweithio gyda phobl o bob cwr o Gymru a rhwydweithio gyda phartneriaid newydd.”

Bydd tîm yr Academi yn swyddfa Comisiynydd Cenedlaethau’r Dyfodol yn dylunio ac yn darparu’r rhaglen, ac yn ystod y cwrs, bydd y cyfranogwyr yn dysgu sgiliau arweinyddiaeth ac arfer da ynghylch gweithredu Deddf Llesiant Cenedlaethau’r Dyfodol a’i saith nod llesiant. Gyda Cymru a diwylliant bywiog ble mae’r Gymraeg yn ffynnu yn un o’r nodau hynny mae’n gyfle i Caryl ddysgu am arfer da eraill ynghyd ag ystyried yn ddwys sut i ymgorffori’r saith nod yn llawn i waith Yr Atom yn ogystal â’r gwaith gwirfoddol mae hi’n ei wneud yn eu bro gyda Mudiad y Ffermwyr Ifanc, yr Urdd a mudiadau eraill.

Meddai Carys Ifan, Cyfarwyddwr Canolfan S4C Yr Egin sydd â chyfrifoldeb strategol am Yr Atom :  

“Mae Caryl wedi cydio’n dynn yn yr awenau yn Yr Atom ers ei phenodi ac yn ystod y flwyddyn a hanner diwetha’ yma wedi arddangos eu gallu a’i photensial. Braf yw ei gweld yn llwyddo i fod yn aelod o’r Academi nodedig hwn ac yn cymryd y cam nesa yn ei datblygiad personol fel arweinydd bydd yn siwr o ddylanwadu’n gadarnhaol ar y dyfodol.”

Ychwanegodd Gwilym Dyfri Jones, Profost Campysau Caerfyrddin a Llambed:  

“Hoffai’r Brifysgol longyfarch Caryl ar ei champ. Dangosodd eisoes, yn ei rôl fel Rheolydd Yr Atom, ei bod yn arweinydd greddfol, a bydd cyfle iddi – drwy gyfrwng y cwrs hwn – fireinio ei sgiliau arwain ymhellach. Dymunwn y gorau iddi.”      

Yn dilyn cyfnod Caryl yn yr Academi, sy’n gyfuniad o sesiynau rhithwir, mewn person a preswyl, mi fydd hi’n derbyn gwahoddiad i fod yn rhan o rwydwaith o gyn-fyfyrwyr yr academi, lle fydd y tîm yn parhau i’w chefnogi gyda’i gyrfa.

Meddai Korina Tsioni, Ysgogwr Newid Arweinwyr y Dyfodol, ac arweinydd yr Academi:  

“Yn dilyn 2 garfan lwyddiannus, rydym newydd lansio ein trydydd Academi Arweinwyr y Dyfodol 3.0. Rydym yn hapus iawn i gael Caryl yn y garfan eleni, daeth drwy’r broses recriwtio agored, a gwnaeth argraff ar y panel gyda’i chais a’i chyfweliad. Ni allwn aros i weld ei chynnydd drwy gydol y flwyddyn academaidd, gyda gweddill y garfan. A hefyd, beth mae hi’n ei wneud nesaf, fel Cyn-fyfyriwr Academi Arweinwyr y Dyfodol Cymru.” 

Gwybodaeth Bellach

Lowri Thomas

Prif Swyddog Cyfathrebu a Chysylltiadau Cyhoeddus      
Cyfathrebu Corfforaethol a Chysylltiadau Cyhoeddus      
E-bost: lowri.thomas@pcydds.ac.uk      
Ffôn: 07449 998476