Anrhydedd dosbarth cyntaf a rôl Pensaernïaeth newydd

Mae’n ddathliad dwbl i Drew Dennehy, o Bridgewater yng Ngwlad yr Haf heddiw wrth iddo raddio gydag anrhydedd dosbarth cyntaf mewn Pensaernïaeth, ac mae ganddo hefyd swydd newydd yn ei ddewis yrfa i edrych ymlaen ati, gan ddechrau fis nesaf.

Bydd Drew yn ymuno â KTA yng Nghaerwysg fel cynorthwyydd pensaernïaeth rhan 1. Ef yw’r cyntaf yn ei deulu i fynd i’r brifysgol, gan oresgyn sawl rhwystr ar y ffordd i gyflawni ei uchelgais o astudio pensaernïaeth.

Dywedodd Drew: “Rydw i mor falch ac yn gyffrous i fod yn dechrau gyda KTA, mae’n gam gwych i mi ac rwy’n falch o’r hyn rydw i wedi’i gyflawni.”

Ar ôl derbyn canlyniadau TGAU da, cafodd Drew ei lywio tuag at yrfa ym maes adeiladu, er gwaethaf ei ddiddordeb mewn dilyn gyrfa greadigol.  Ar ôl 18 mis fel prentis plymio a gwresogi a chyflawni ei gymwysterau lefel 2 a 3, roedd yn dal i fod eisiau archwilio gyrfa a fyddai’n ei alluogi i ddatblygu ei sgiliau personol a phroffesiynol mewn maes creadigol.  Er iddo gysylltu â sawl prifysgol i ddarganfod pa opsiynau oedd ar gael iddo, cafodd ei wrthod yn fynych.

Dywedodd Drew: “Cwblhawyd y cwrs plymio trwy brentisiaeth a oedd yn golygu nad oedd gen i Lefel A draddodiadol i’s gynnig. Yn syth roedd y prifysgolion y cysylltais â nhw yn gy nghynghori i gael Lefel A ac i gysylltu wedyn. Felly, es yn ôl i’m coleg a roddodd wybod i mi, oherwydd fy mod dros 19 oed, y byddai’n rhaid i mi dalu am hyfforddiant preifat a’r arholiadau.  Ar y pryd roeddwn i’n gweithio am £6.90 yr awr felly doedd hyn ddim yn opsiwn i mi. Fe wnes i barhau i ofyn i wahanol brifysgolion a allent fy nerbyn fel myfyriwr aeddfed ond eto cefais fy ngwrthod heb fawr o gyngor ar beth arall y gallwn ei wneud i gyflawni eu gofynion mynediad”. 

Er iddo ymgymryd â phrofiad gwaith gyda phensaer a llunio portffolio, roedd yn dal i gael ei wrthod gan y prifysgolion a aeth atynt.  Daeth tro yn ei fyd drwy gyfarfod ar hap gyda chyn-aelod o staff PCYDDS a ddywedodd wrtho am gysylltu ag Ian Standen, cyfarwyddwr y cwrs pensaernïaeth.

Aeth Drew yn ei flaen:   

“Mynychais ddiwrnod agored nesaf y Brifysgol, a oedd ar-lein oherwydd COVID-19, a gofynnais i siarad ag Ian yn breifat ar y diwedd pan amlinellais fy sefyllfa.  Ef oedd y darlithydd cyntaf y siaradais ag ef a oedd yn cydnabod fy nghefndir plymio fel mantais ym myd pensaernïaeth a gofynnodd am weld portffolio iddo ei adolygu. Felly, o’r fan honno, es i drwy’r system ymgeisio UCAS a chael cynnig am le yn y Brifysgol lle rwyf wedi parhau i fod yr un mor frwdfrydig ac angerddol am y pwnc a byddaf yn graddio eleni.

“Mae’r darlithwyr a’r myfyrwyr eraill wedi bod yn wych. Mae lefel amser un wrth un gyda darlithwyr yn rhywbeth nad oes yr un o fy ffrindiau yn dweud wrthyf eu bod wedi ei brofi mewn prifysgolion eraill. Mae lefel iach o gystadleuaeth lle mae pawb eisiau cynhyrchu eu gwaith gorau, ond os bydd rhywun yn darganfod techneg newydd, maen nhw’n dal i’w rhannu ymhlith eu cyfoedion. Dros y tair blynedd diwethaf, rydyn ni i gyd wedi dod yn agos ac wedi dod i adnabod ein gilydd yn dda. Mae gweld sut maen nhw wedi datblygu pob un yn unigol wedi gorfod bod yn un o’r uchafbwyntiau mwyaf i mi”.

“Mae’r darlithwyr yn glod i’r cwrs ac yn paratoi myfyrwyr ar gyfer ymarfer. Rydym yn astudio agweddau busnes a thechnegol dylunio yn ogystal â’r estheteg sy’n ein galluogi i gynnig mwy i gyflogwyr. Roedd y darlithwyr hefyd yn hawdd mynd atynt mewn person a thros y ffôn”.

Dywedodd Ian Standen, Cyfarwyddwr y Cwrs: 

“Rhaid i’r athro rywsut weld y tu hwnt i’r presennol a chydnabod egin botensial myfyriwr, i feithrin, annog ac arwain y dalent gudd.

“Nid yw cyfle yn gwneud y pensaer; Mae’n datgelu’r disgleirdeb sydd eisoes y tu mewn. Mae cyflawniadau Drew  yn dyst i’w ddawn a’i ymroddiad. Fy neges iddo wrth iddo ymadael yw parhau i ddylunio ei freuddwydion, oherwydd y byd yw ei gynfas nawr. “

Yn ystod ei gyfnod yn y Brifysgol, mae Drew wedi cael llawer o brofiadau, gan gynnwys cynrychioli’r Brifysgol mewn digwyddiad WorldSkills UK ar gyfer adeiladu digidol. Mae wedi cwblhau cynllun mentora Cymdeithas Frenhinol Penseiri yng Nghymru (RSAW) ac yn ystod y cyfnod hwnnw bu’n ymweld yn aml â’r practis pensaernïaeth Powell Dobson ar gyfer adolygiadau a thrafodaethau am ei CV ac fe’i enwebwyd yn ddiweddar ar gyfer Medal Efydd yr RIBA.

Gwybodaeth Bellach

Rebecca Davies

Swyddog Gweithredol Cysylltiadau â’r Wasg a’r Cyfryngau     
Cyfathrebu Corfforaethol a Chysylltiadau Cyhoeddus     
E-bost: rebecca.davies@pcydds.ac.uk     
Ffôn: 07384 467071