Cydweithio gyda Choleg Sir Benfro i Arwain ym maes Pontio Gwyrdd a Digidol

Mae Athrofa Ryngwladol er Datblygiad Entrepreneuraidd Creadigol (IICED)  ym Mhrifysgol Cymru Y Drindod Dewi Sant (PCYDDS) wedi bod yn gweithio gyda Choleg Sir Benfro i gyflwyno offeryn SCAFFOLD am y tro cyntaf yn y DU. 

Cynlluniwyd y fenter strategol hon i wella galluoedd rheolwyr cwricwlwm, gan eu grymuso i integreiddio strategaethau addysgol arloesol sy’n canolbwyntio ar y trawsnewidiadau gwyrdd a digidol ynghyd â Chwricwlwm i Gymru, Dyfodol Llwyddiannus.

Meddai Hazel Israel o’r Brifysgol: 

“Mae’r sesiwn hyfforddi arloesol hon, a gynhelir yng Ngholeg Sir Benfro, yn nodi ymddangosiad cyntaf y DU ar yr offeryn SCAFFOLD, a ddatblygwyd yn wreiddiol gan y Sefydliad Hyfforddiant Ewropeaidd (ETF) a’r Ganolfan Ymchwil ar y Cyd (JRC) gyda chyfraniadau sylweddol gan IICED. Mae’r offeryn, sy’n hwyluso datblygiad cymwyseddau trawsnewidiol mewn dysgwyr, wedi’i deilwra’n benodol i ddiwallu anghenion addysgwyr modern a rheolwyr cwricwlwm” .

Yn ystod y gweithdy, bu rheolwyr cwricwlwm o wahanol adrannau yng Ngholeg Sir Benfro yn ymgysylltu â’r offeryn SCAFFOLD i archwilio dulliau arloesol o addysgu sy’n cyd-fynd â blaenoriaethau gwyrdd a digidol y sector addysgol heddiw. Mae pwyslais yr offeryn ar gymwyseddau mentrus, gwyrdd a digidol yn helpu addysgwyr i ddylunio a gweithredu gweithgareddau dysgu sy’n ddeinamig ac yn canolbwyntio ar y dyfodol.

Mynegodd Jackie Mathias, Pennaeth Cynorthwyol, Coleg Sir Benfro ei brwdfrydedd ynghylch y fenter: 

“Trwy fabwysiadu’r offeryn SCAFFOLD a’r fframwaith EntreComp yma yng Ngholeg Sir Benfro, nid dim ond diweddaru ein dulliau addysgu yr ydym; rydym yn arwain y ffordd wrth baratoi ein haddysgwyr a’n myfyrwyr ar gyfer y newidiadau sylweddol tuag at gynaliadwyedd a thechnoleg ddigidol”.

Mae’r cydweithio rhwng Coleg Sir Benfro a’r Drindod Dewi Sant trwy IICED yn enghraifft o botensial partneriaeth wrth hyrwyddo arferion addysgol sy’n cefnogi newidiadau cymdeithasol a thechnolegol sylweddol. Ychwanegodd Hayley Williams, Rheolwr Datblygu Cwricwlwm yng Ngholeg Sir Benfro:

“Mae’r fenter hon hefyd yn amlygu addasrwydd offeryn SCAFFOLD i leoliadau addysgol amrywiol, gan atgyfnerthu ei effeithiolrwydd ar draws pob cyfadran waeth beth fo’r maes pwnc.” 

“Mae Coleg Sir Benfro yn parhau i fod yn ymrwymedig i integreiddio offer a methodoleg blaengar yn ei gwricwlwm er mwyn paratoi myfyrwyr yn well ar gyfer heriau’r byd modern. Mae gweithrediad llwyddiannus yr offeryn SCAFFOLD yn gosod meincnod newydd ar gyfer arloesi addysgol yng Nghymru a thu hwnt

Gwybodaeth Bellach

Eleri Beynon

Pennaeth Cyfathrebu Corfforaethol a Chysylltiadau Cyhoeddus    
Cyfathrebu Corfforaethol a Chysylltiadau Cyhoeddus     
E-bost: e.beynon@pcydds.ac.uk  
Ffôn: 07968 249335