Dwyieithrwydd ac Amlieithrwydd (Llawn amser) (MA)

Manteisia’r radd MA Dwyieithrwydd ac Amlieithrwydd ar y profiad ieithyddol cyfoethog a gynigir gan y cyd-destun dwyieithog yng Nghymru yn ogystal ag arbenigedd cydnabyddedig Prifysgol Cymru y Drindod Dewi Sant yn y maes. Mae’r Brifysgol yn rhan o rwydwaith ymestynnol o sefydliadau ar draws Ewrop lle mae dwyieithrwydd, amlieithrwydd a chynllunio iaith yn nodwedd feunyddiol.

Oddi ar sefydlu Cynulliad Cenedlaethol Cymru ym 1999, rhoddwyd ffocws newydd i’r ymdrechion i ddiogelu ac adfer y Gymraeg, ac ystyrir creu Cymru ddwyieithog yn nod cenedlaethol cyraeddadwy. Gosod y datblygiadau cyffrous hyn yn eu cyd–destun hanesyddol, gwleidyddol, cymdeithasol a rhyngwladol yw nod y radd MA Dwyieithrwydd ac Amlieithrwydd.

Er ei pherthnasedd i’r cyd-destun Cymraeg a Chymreig, mae’r i’r radd MA ffocws rhyngwladol y gellir elwa arno er budd y sefyllfa yn genedlaethol.
Mae’r rhaglen yn anelu at:

• ddarparu ystod o agweddau ar faes dwyieithrwydd ac amlieithrwydd yng Nghymru a chyd-destunau rhyngwladol;
• ddatblygu gallu myfyrwyr i ddadansoddi’n feirniadol y ffactorau amrywiol sydd ymhlŷg ag astudio dwyieithrwydd/amlieithrwydd ac i berthnasu’r ffactorau hynny â chyd-destunau cenedlaethol a rhyngwladol;
• ddarparu myfyrwyr ar gyfer galwedigaethau amrywiol sy’n ymwneud â dwyieithrwydd/ amlieithrwydd a’u galluogi i gymhwyso egwyddorion sylfaenol, ynghyd â gwybodaeth, dealltwriaeth a medrau pwnc-seiliedig, at eu hanghenion galwedigaethol beunyddiol;
• gyflwyno i fyfyrwyr y syniadaeth a’r ymchwil mwyaf perthnasol yn y maes sydd yn sail i’r damcaniaethau a’r doethineb diweddaraf;
• ddatblygu medrau trosglwyddadwy myfyrwyr a’u gallu i ymchwilio, dehongli a gwerthuso’n feirniadol;
• ddatblygu medrau gwybyddol myfyrwyr gan gynnwys eu gallu i resymu, dadansoddi’n feirniadol, yn ogystal â meddwl yn greadigol gan arfarnu unrhyw bolisïau presennol ym maes dwyieithrwydd/ amlieithrwydd a chynnig gwelliannau.

Canolbwyntir ar amryw agweddau ar ddwyieithrwydd a chynllunio iaith sydd yn berthnasol i ystod o swyddi proffesiynol a galwedigaethol yn ymwneud â iaith gan ymestyn a dyfnhau gwybodaeth, dealltwriaeth a medrau mewn meysydd penodol.

Bydd y medrau proffesiynol / galwedigaethol a gysylltir â’r rhaglen hon yn galluogi myfyrwyr i:

• gwrdd â’r her sy’n wynebu unigolion ym maes dwyieithrwydd / amlieithrwydd a chynllunio iaith;
• ymgymryd â phrosiectau sy’n ymwneud ag amryw agweddau ar y maes;
• gynnal ymchwil unigol ac, fel rhan o dîm, i hyrwyddo cynlluniau a strategaethau ieithyddol;
• ddadansoddi a dehongli data sy’n ymwneud ag amryw ddatblygiadau;
• ddangos hyfedredd wrth ddefnyddio TGCh mewn cyflwyniadau ac wrth gyfathrebu.

Pan fydd hynny’n gyfleus yn ddaearyddol, rhoddir cyfle i fyfyrwyr fynychu cynadleddau cenedlaethol a rhyngwladol ar ddwyieithrwydd a chynllunio iaith.

Mantais y radd MA Dwyieithrwydd ac Amlieithrwydd i fyfyrwyr yw’r hyblygrwydd sydd yn caniatáu iddynt feithrin y wybodaeth a’r sgiliau angenrheidiol drwy ddysgu o bell ac astudio’n rhan-amser neu yn amser -llawn, a hynny gyda chymorth technoleg a’r deunydd darllen a ddarperir. Gellir astudio cyn lleied â dau fodwl y flwyddyn gan rannu’r gost dros gyfnod yr astudiaeth. Gan ei bod yn ddarpariaeth dysgu o bell, mae’r rhaglen wedi cynnwys myfyrwyr o bob rhan o’r byd, gan gynnwys, er enghraifft: Yr Eidal, Y Swistir, Y Weriniaeth Tsiec, Cyprus, Groeg, Mongolia, Brasil, Yr Iseldiroedd, Nigeria, Yr Almaen, Sbaen, Tsieina, Yr Emiradau Arabaidd Unedig, Estonia, Lloegr, Yr Alban, Cymru.

Gan fod y ddau fodwl sydd yn perthyn i’r Dystysgrif Ôl-raddedig mewn Polisi a Chynllunio Iaith yn rhan o’r rhaglen MA mewn Dwyieithrwydd ac Amlieithrwydd, bydd modd i fyfyrwyr sydd eisoes wedi astudio’r modylau hynny’n llwyddiannus drosglwyddo’u credydau i’r rhaglen MA os dymunant.